ការទិញផ្ទះរស់នៅពិតជាមានតម្លៃថ្លៃណាស់។ មនុស្សភាគច្រើនត្រូវខ្ចីប្រាក់ ហើយបង់សងក្នុងរយៈពេល ១០ ឆ្នាំ មុនពេលមានផ្ទះពេញលេញជាកម្មសិទ្ធិផ្ទាល់ខ្លួន។ ចុះបើផ្ទះរបស់លោកអ្នកខូចខាត ដូចជាមានបញ្ហាឆ្លងអគ្គិសនី ហើយផ្ទះទាំងមូលត្រូវបានឆាបឆេះ ? គ្មាន​នរណា​ម្នាក់​ចង់​ឱ្យ​វា​កើត​ឡើងនោះ​ទេ។ នេះជាមូលហេតុដែលការរក្សាផ្ទះរបស់លោកអ្នកឱ្យមានសុខសុវត្ថិភាពគឺពិតជាសំខាន់ ជាពិសេសចៀសផុតពីគ្រោះមហន្តរាយដែលអាចបង្កគ្រោះថ្នាក់ដល់មនុស្ស និងមានការបាត់បង់ទ្រព្យសម្បត្តិជាដើម។ ប្រសិនបើលោកអ្នកមិនមានការប្រុងប្រយ័ត្ននោះទេ តែមួយភ្លែតប៉ុណ្ណោះ ការខូចខាតដែលមិនបានរំពឹងទុកនឹងអាចកើតមានឡើងចំពោះផ្ទះរបស់លោកអ្នកជាក់ជាមិនខាន។

ពាក្យចាស់លោកតែងពោលថា "ចោរលួចនៅចាញ់ភ្លើងឆាបឆេះតូចមួយនៅក្នុងផ្ទះនោះទេ" នេះមានន័យថា យើងមិនគួរមើលស្រាលគ្រោះថ្នាក់នៃភ្លើងឆាបឆេះតូចមួយនោះឡើយ។ ថ្ងៃនេះលោកអ្នកនឹងទទួលបានការចែករំលែកនូវ១០វិធីសាស្រ្ត ជួយក្នុងការការពារពីភ្លើងដែលអាចបណ្តាលឱ្យឆាបឆេះដល់ផ្ទះរបស់លោកអ្នក។

១. របៀបទុកដាក់របស់របរ និងគ្រឿងប្រើប្រាស់ជាពិសេសរបស់របរណាដែលមានផ្ទុកសារធាតុប្រេងឥន្ធនៈដែលអាចបង្កជាអគ្គីភ័យ

ទុកដាក់វត្ថុដែលងាយឆាបឆេះឱ្យមានរបៀបចៀសផុតពីការឆាបឆេះទៅដល់ផ្ទះរបស់លោកអ្នក។ នេះរាប់បញ្ចូលទាំងកាសែត ទស្សនាវដ្តី សំលៀកបំពាក់ចាស់ៗ និងឧបករណ៍ប្រើប្រាស់ក្នុងផ្ទះដែលមានសារធាតុគីមីឆាបឆេះបានដូចជា ទឹកសម្អាត ថ្នាំលាប និងថ្នាំអាសេរ៉ូលជាដើម។ ប្រសិនបើវត្ថុងាយឆេះទាំងនេះត្រូវបានរក្សាទុកនៅកន្លែងដែលមានកំដៅ ឬសីតុណ្ហភាពខ្ពស់ វានឹងងាយឆាបឆេះ ហើយបណ្តាលឱ្យមានការផ្ទុះទៀតផង។ វាមានសារៈសំខាន់ណាស់ក្នុងការរក្សាទុកវត្ថុងាយឆាបឆេះនៅក្នុងកន្លែងបិទជិត និងត្រជាក់ដើម្បីការពារកុំឱ្យវាបង្កជាបញ្ហាអគី្គភ័យ។

២. ត្រួតពិនិត្យឧបករណ៍អគ្គិសនី និងខ្សែភ្លើងឱ្យបានទៀងទាត់ ហើយបិទកុងតាក់ភ្លើងនៅពេលប្រើប្រាស់រួចរាល់

តែងតែដកឧបករណ៍អគ្គិសនីបន្ទាប់ពីប្រើរួច ហើយពិនិត្យមើលស្ថានភាពនៃរុន្ធដោត។ មុនពេលប្រើឧបករណ៍អគ្គិសនីណាមួយក៏សូមឱ្យប្រាកដថាវាដំណើរការបានល្អ។ ប្រសិនបើលោកអ្នកសម្គាល់ឃើញបញ្ហាណាមួយ ដូចជាខ្សែដែលដាច់ ឬខូច ចូរជួសជុលវាភ្លាមៗ។

៣. បិទហ្គាសពេលឈប់ប្រើប្រាស់

អគ្គីភ័យដែលចាប់ផ្តើមឆាបឆេះដំបូងគេនោះអាចចេញពីផ្ទះបាយវាគឺជាមូលហេតុមួយក្នុងចំណោមមូលហេតុទូទៅធំបំផុតនៃអគ្គីភ័យដល់ផ្ទះដែលមានសមាមាត្រប្រមាណ ៤៨% នៃបញ្ហាភ្លើងឆាបឆេះក្នុងផ្ទះ។ នេះច្រើនតែបណ្តាលមកពីការធ្វេសប្រហែសនៅពេលចម្អិនអាហារ ដោយភ្លេចបិទចង្ក្រានហ្គាសនៅពេលចម្អិនរួច។ សំណល់អាហារដែលជាប់នៅក្នុងឡ ឬមីក្រូវ៉េវក៏អាចឆេះបានដែរ ប្រសិនបើបើកចោលយូរពេកដែលបង្កបានជាកំដៅក្តៅខ្លាំងរហូតដល់ឆេះ។ នេះហើយជាមូលហេតុដែលគួរយកចិត្តទុកដាក់ក្នុងការសម្អាតចង្ក្រាន និងមីក្រូវ៉េវជាប្រចាំ។ ត្រូវប្រាកដថាបានប្រមូល និងបោះចោលកាកសំណល់អាហារ ឬវត្ថុងាយឆាបឆេះផ្សេងទៀត បន្ទាប់ពីចម្អិនអាហាររួចរាល់។

៤. បំពាក់ឧបករណ៍កាត់ផ្តាច់ចរន្តអគ្គិសនីដើម្បីការពារការញាក់នៃចរន្តអគ្គិសនី

ការឆ្លង​ចរន្ត​អគ្គិសនីដែល​បណ្តាល​ឱ្យឆាប​ឆេះ​ផ្ទះជាសមាមាត្រ​ប្រមាណ​ ១០%។ ទោះជាភាគរយទាបក៏ដោយ តែការឆ្លង​ចរន្ត​អគ្គិសនីនេះអាចមានគ្រោះថ្នាក់ខ្លាំង និងនាំឱ្យមានរបួសធ្ងន់ធ្ងរ ស្លាប់ និងខូចខាតទ្រព្យសម្បត្តិ។ នេះ​ដោយសារ​តែ​ការញាក់នៃចរន្តអគ្គិសតែងតែ​កើតឡើង​ ​ឬមានការបង្ខាំងណាមួយនៃខ្សែភ្លើង ដែលវា​អាច​រាលដាល​យ៉ាង​លឿន។ វាតែងតែកើតឡើងជាញឹកញាប់នៅពេលយប់ដែលជាពេលយើងកំពុងដេក។ មធ្យោបាយដ៏ល្អដើម្បីការពារប្រឆាំងនឹងការញាក់នៃចរន្តអគ្គិសគឺត្រូវដំឡើងប្រព័ន្ធកាត់ផ្តាច់ចរន្ត​អគ្គិសនី​។ វានឹងបិទដោយស្វ័យប្រវត្តិ ប្រសិនបើចរន្តអគ្គិសនីផ្ទុកលើសលប់ ឬបង្ហាញសញ្ញានៃការញាក់នៃចរន្តអគ្គិស។ នេះអាចជួយបញ្ឈប់ពីការរីករាលដាលឆ្លងនៃ​ចរន្ត​អគ្គិសនី។

៥. ​ហាម​អុជ​ធូប អុជ​ទៀនបូជា​ព្រះ ឬ​ទុក​កន្ទុយ​បារីចោល​ពេល​គ្មាននរ​ណា​នៅ​ក្នុង​ផ្ទះ

ទុកដៃកេស ឈើគូស និងឧបករណ៍ដុតផ្សេងទៀតឱ្យឆ្ងាយពីកំដៅ និងការខ្ទាតចូលនៃផ្កាភ្លើង ដើម្បីការពារកុំឱ្យភ្លើងឆាបឆេះ។ ស្រដៀងគ្នានេះដែរ ប្រសិនបើលោកអ្នកជក់បារី ហើយមិនពន្លត់វាបានល្អទាំងស្រុងនោះទេ នោះបារីរបស់លោកអ្នកនៅតែបន្តឆេះ និងអាចបង្កជាបញ្ហាឆាបឆេះដោយលោកអ្នកមិនដឹងខ្លួនទៀតផង។ លោកអ្នក​ត្រូវ​ប្រយ័ត្ន​ឱ្យ​មែនទែន ចំពោះ​កំហុស​តូចតាច​បែប​នេះព្រោះវា​អាច​ឈាន​ដល់​ការ​ឆាបឆេះផ្ទះទាំងមូល​បាន ​។

៦. បង្កការឆាបឆេះពីឧបករណ៍អគ្គិសនីមួយចំនួន

ឧបករណ៍ដូចជាទូរទស្សន៍ និងទូទឹកកក គួរតែរក្សាគម្លាតឱ្យបានឆ្ងាយពីជញ្ជាំងសមល្មម ដើម្បីអនុញ្ញាតឱ្យមានការបញ្ចេញកំដៅបានត្រឹមត្រូវ។ នេះជួយការពារពីការផ្ទុះដែលអាចឆាបឆេះបាន។

៧. ដំឡើងឧបករណ៍ចាប់ផ្សែងបន្លឺសម្លេងនៅក្នុងផ្ទះ

បើមានហើយ គួរតែពិនិត្យឧបករណ៍ចាប់ផ្សែងរបស់លោកអ្នកជាទៀងទាត់ដោយចុចប៊ូតុងសាកល្បង។ វានឹងអនុញ្ញាតឱ្យលោកអ្នកដឹងថាតើឧបករណ៍ដំណើរការបានត្រឹមត្រូវឬទេ។

៨. រក្សាទុកលេខទំនាក់ទំនងស្ថានីយ៍ពន្លត់អគ្គីភ័យដែលនៅជិតផ្ទះរបស់អ្នកបំផុត ឬលេខសង្គ្រោះបន្ទាន់ផ្សេងៗ

ទុកធុងពន្លត់អគ្គីភ័យរបស់លោកអ្នកនៅកន្លែងដែលអ្នកគ្រប់គ្នានៅក្នុងផ្ទះអាចមើលឃើញ។ មធ្យោបាយនេះ ប្រសិនបើមានភ្លើងឆាបឆេះភ្លាមៗ យើងអាចរកបំពង់ពន្លត់អគ្គិភ័យបានយ៉ាងលឿន ដើម្បីពន្លត់វា។

៩. ដំឡើងឧបករណ៍ពន្លត់អគ្គីភ័យនៅក្នុងផ្ទះ

ត្រូវប្រាកដថាអ្នកគ្រប់គ្នានៅក្នុងផ្ទះរបស់លោកអ្នកដឹងពីរបៀបប្រើប្រាស់ឧបករណ៍ពន្លត់អគ្គីភ័យឱ្យបានត្រឹមត្រូវ។ ដូចគ្នានេះផងដែរ ពិនិត្យមើលឧបករណ៍ពន្លត់អគ្គីភ័យឱ្យបានទៀងទាត់ ដើម្បីប្រាកដថាវាស្ថិតក្នុងស្ថានភាពដំណើរការល្អ។ ត្រូវផ្លាស់ប្តូរឧបករណ៍ពន្លត់អគ្គីភ័យនៅពេលដែលវាបានដល់អាយុកាលដែលមិនអាចប្រើប្រាស់បានបន្តទៀត។

១០. ត្រួតពិនិត្យជាប្រចាំ និងមានការប្រុងប្រយ័ត្ន

ជាឧទាហរណ៍ ពេលចម្អិនអាហារនៅក្នុងផ្ទះបាយ មិនត្រូវទុកចង្ក្រានចោលដោយគ្មានមនុស្សនៅទីនោះឡើយ។ លោកអ្នកបិទហ្គាសឬចង្ក្រានជានិច្ច ប្រសិនបើលោកអ្នកមិននៅក្នុងផ្ទះបាយ។ ប្រសិនបើលោកអ្នកដុតទៀន ឬធូប ចូរទុកវាឱ្យឆ្ងាយពីវត្ថុដែលអាចឆេះបាន ហើយពន្លត់វាចេញភ្លាមៗនៅពេលប្រើប្រាស់រួចរាល់។ សូមប្រុងប្រយ័ត្នពេលប្រើឧបករណ៍អគ្គិសនីផ្សេងៗដូចគ្នាដែរ។ ប្រសិនបើលោកអ្នកសម្គាល់ឃើញថាមានបញ្ហា ឬខូចត្រង់កន្លែងណាមួយ ចូរដោះស្រាយជួសជុលវាភ្លាមៗ។