នៅពេលឈានដល់ចុងខែ មនុស្សជាច្រើនតែងតែសង្ស័យថា តើថវិការបស់ពួកគេបានបាត់បង់ទៅទីណា។ ជាក់ស្ដែង ពួកគេមិនបានទិញសម្ភារៈប្រើប្រាស់ថ្លៃៗដូចជាទូរស័ព្ទ ឬគ្រឿងអលង្ការអ្វីនោះទេ។ ចម្លើយដ៏សាមញ្ញបំផុត គឺអាចមកពី “ការចំណាយតិចតួច” ជាប្រចាំ ដែលយើងតែងតែមើលរំលង។ វាប្រៀបបានទៅនឹងទូកដែលមានស្នាមធ្លាយតូចៗជាច្រើនកន្លែង។
ប្រសិនបើអ្នកចង់បិទស្នាមធ្លាយទាំងនោះ ហើយចាប់ផ្តើមឃើញលុយសល់ ចូរពិចារណាអនុវត្តទម្លាប់សន្សំសំចៃដ៏មានប្រសិទ្ធភាពទាំងនេះ៖
១. ផ្លាស់ប្តូរទម្លាប់អាហារ និងការទិញម្ហូប
សម្រាប់មនុស្សភាគច្រើន ខ្ទង់ចំណាយធំបំផុតប្រចាំខែ គឺថ្លៃអាហារ។ នេះគឺជាកន្លែងដែល “លុយធ្លាយ” ច្រើនជាងគេ ហើយក៏ជាកន្លែងដែលងាយស្រួលកែតម្រូវជាងគេដែរ។
    ក. ឈប់ញ៉ាំអាហារព្រឹកនៅខាងក្រៅ នៅពេលព្រឹក យើងតែងតែប្រញាប់ប្រញាល់ ហើយការទិញបបរសាច់ជ្រូកមួយចាន ឬគុយទាវមួយចាននៅខាងក្រៅ ហាក់ដូចជាជម្រើសដ៏ងាយស្រួលបំផុត។ ការដាំបាយ រក្សាទុកសម្រាប់ឆា ការចៀនពងទាជាមួយនំប៉័ង ឬសូម្បីតែបបរធម្មតា ក៏អាចជួយសន្សំប្រាក់បានយ៉ាងច្រើនដែរ។ ក្រៅពីសន្សំលុយ អ្នកក៏អាចគ្រប់គ្រងគុណភាពអនាម័យ និងអាហារូបត្ថម្ភ បានល្អជាងមុនផងដែរ។
    ខ. ទិញម្ហូបត្រូវចេះតថ្លៃ នេះគឺជាជំនាញដ៏សំខាន់មួយ ជាពិសេសសម្រាប់អ្នកដែលទៅផ្សារប្រចាំថ្ងៃ។ មនុស្សជាច្រើន ជាពិសេសយុវវ័យ អាចនឹងមានអារម្មណ៍ខ្មាសអៀនក្នុងការតថ្លៃ ដោយគិតថាវាជារឿងតូចតាច។ ប៉ុន្តែ ត្រូវចាំថា ទម្លាប់សន្សំសំចៃដ៏ល្អរបស់ស្រ្តីមេផ្ទះជាច្រើន គឺការតថ្លៃនេះឯង។ ការតថ្លៃ អាចស្តាប់ទៅដូចជាតូចតាច ប៉ុន្តែអាចជួយអ្នកបានសន្សំបន្ថែម ដោយគ្រាន់តែប្រើពាក្យសម្តីបន្តិចបន្តួចប៉ុណ្ណោះ។
    គ. ដាក់ទឹកតាមខ្លួន ទិញដបទឹកផ្ទាល់ខ្លួនមួយ (ប្រភេទដែលអាចប្រើឡើងវិញបាន) ហើយដាំទឹកទុកឲ្យត្រជាក់ ឬទិញទឹកធុងធំមកច្រកដាក់តាមខ្លួន។ វាមិនត្រឹមតែជួយសន្សំប្រាក់ទេ តែថែមទាំងល្អសម្រាប់សុខភាព (ជួយឲ្យអ្នកផឹកទឹកបានច្រើន ជំនួសឲ្យការទិញភេសជ្ជៈផ្អែម ឬកាហ្វេថ្លៃៗ) និងចូលរួមចំណែកកាត់បន្ថយកាកសំណល់ប្លាស្ទិកយ៉ាងច្រើនផងដែរ។
២. បង្កើតទម្លាប់សន្សំសំចៃនៅផ្ទះ
វិក្កយបត្រទឹកភ្លើង គឺជាការចំណាយប្រចាំខែដែលលួចលុយពីកាបូបយើងដោយស្ងៀមស្ងាត់។ យើងតែងតែបើកភ្លើងចោលក្នុងបន្ទប់ដែលគ្មានមនុស្ស បើកទូរទស្សន៍ចោលទាំងមិនមើល ឬបើកកង្ហារចោលពេញមួយថ្ងៃ។
    ក. សន្សំសំចៃអគ្គិសនី និងទឹក ចូរចាប់ផ្តើមបង្កើតទម្លាប់សាមញ្ញៗ៖ បិទភ្លើង បិទកង្ហារ ឬម៉ាស៊ីនត្រជាក់ នៅពេលអ្នកដើរចេញពីបន្ទប់។ ដកឌុយឧបករណ៍អគ្គិសនី (ដូចជាឆ្នាំងសាកទូរស័ព្ទ ទូរទស្សន៍ ឆ្នាំងដាំបាយ) នៅពេលមិនប្រើប្រាស់ ព្រោះវា “ស៊ីភ្លើង” បន្តិចបន្តួច ទោះបីជាបិទក៏ដោយ Standby Power។ ម្យ៉ាងទៀត កុំបើកទឹកចោលពេលកំពុងដុសធ្មេញ ឬកក់សក់ ហើយឆាប់ជួសជុលរ៉ូប៊ីណេទឹកដែលជ្រាប។ ទម្លាប់តូចៗទាំងនេះ នឹងធ្វើឲ្យវិក្កយបត្ររបស់អ្នកធ្លាក់ចុះគួរឲ្យកត់សម្គាល់នៅចុងខែ។
៣. ព្យាយាមបង្កើតប្រភពផ្គត់ផ្គង់ខ្លួនឯង 
នេះគឺជាជំហានបន្ទាប់ ដែលមិនត្រឹមតែជួយសន្សំទេ ថែមទាំងអាចបង្កើតចំណូលទៀតផង។
    ក. ដាំបន្លែចាំបាច់តិចតួចនៅផ្ទះ ទោះបីអ្នករស់នៅក្នុងផ្ទះល្វែង ឬបន្ទប់ជួលតូចក៏ដោយ អ្នកនៅតែអាចដាំបន្លែមួយចំនួនក្នុងផើង ឬធុងស្នោបាន។ ចូរចាប់ផ្តើមដាំបន្លែដែលអ្នកប្រើញឹកញាប់បំផុត ដូចជា៖ ជី ស្លឹកគ្រៃ ម្ទេស ខ្ទឹម ស្លឹកតើយ ឬត្រកួន។ វាមិនត្រឹមតែជួយសន្សំប្រាក់លើការទិញម្ហូបប្រចាំថ្ងៃប៉ុណ្ណោះទេ ប៉ុន្តែអ្នកថែមទាំងទទួលបានបន្លែធម្មជាតិ ស្រស់ៗ គ្មានជាតិគីមី សម្រាប់សុខភាពគ្រួសារអ្នកទៀតផង។
    ខ. ចិញ្ចឹមមាន់ ទា (បើមានដីទំនេរ) ប្រសិនបើអ្នកមានទីធ្លា ឬដីទំនេរនៅក្រោយផ្ទះ សូម្បីតែបន្តិចបន្តួច ការចិញ្ចឹមមាន់ ឬ ទា គឺជាវិធីសាស្ត្រដ៏ល្អបំផុតមួយក្នុងការប្រែក្លាយទីធ្លាទំនេរទៅជា “ម៉ាស៊ីនផលិតអាហារ”។ អ្នកនឹងមានពងមាន់ ឬពងទា ស្រស់ៗ ជារៀងរាល់ថ្ងៃ សម្រាប់គ្រួសារ ដោយមិនចាំបាច់ទិញពីផ្សារ។ បើវាពងច្រើនលើសពីតម្រូវការ, អ្នកអាចលក់ពងទាំងនោះទៅឲ្យអ្នកជិតខាង ដើម្បីបង្កើតប្រាក់ចំណូលបន្ថែមទៀតផង។
ការចំណាយតូចតាចទាំងនេះ មើលទៅហាក់ដូចជាមិនច្រើនទេក្នុងមួយថ្ងៃៗ ប៉ុន្តែនៅពេលបូកសរុបប្រចាំខែ ឬប្រចាំឆ្នាំ វាជាចំនួនដ៏គួរឲ្យភ្ញាក់ផ្អើល។ ស្ថិរភាពហិរញ្ញវត្ថុ មិនមែនកើតឡើងតែពីការរកចំណូលបានច្រើនតែមួយមុខទេ វាទាមទារការគ្រប់គ្រង “ចំណាយ” ដ៏ឈ្លាសវៃផងដែរ។ ការចាប់ផ្តើមអនុវត្តទម្លាប់សន្សំសំចៃទាំងនេះ នឹងជួយបិទខ្ទង់ចំណាយដែលលេចធ្លាយ និងធ្វើឲ្យអ្នកឃើញលុយសល់ច្រើនជាងមុន។