ការមានបំណុលគឺជាបញ្ហាប្រឈមធំមួយដែលគ្រួសារជាច្រើនបានជួបប្រទះ ហើយវាអាចបង្កភាពតានតឹងផ្លូវចិត្ត និងគំរាមកំហែងដល់សុខុមាលភាពក្នុងគ្រួសារ។ ទោះជាយ៉ាងណាក៏ដោយ បញ្ហាទាំងអស់តែងតែមានដំណោះស្រាយ។ យើងខ្ញុំសូមជូនដំណោះស្រាយយុទ្ធសាស្ត្រសំខាន់ៗចំនួន ៣ ដែលយើងខ្ញុំ គិតថាអាចជួយគ្រួសាររបស់លោកអ្នកឲ្យរួចផុតពីសម្ពាធបំណុល និងឈានទៅរកអនាគតហិរញ្ញវត្ថុដ៏រឹងមាំ។

បញ្ហាប្រឈមទី ១៖ ការទម្លាក់កំហុសដាក់គ្នា និងបាត់បង់ការសាមគ្គី
នៅពេលដែលបញ្ហាបំណុលចូលមកដល់ គូស្វាមីភរិយា ឬសមាជិកគ្រួសារច្រើនតែចាប់ផ្ដើមស្តីបន្ទោសគ្នាទៅវិញទៅមក ដែលធ្វើឲ្យស្ថានភាពកាន់តែអាក្រក់ និងបាក់បែកចំណងមិត្តភាព។
💡 ដំណោះស្រាយ៖ ការសហការគ្នាយ៉ាងស្អិតរមួត (Treat Debt as a Common Enemy)
គន្លឹះដំបូងបំផុតគឺត្រូវប្ដូរផ្នត់គំនិត។ ត្រូវចាត់ទុក "បំណុល" ជាសត្រូវរួមរបស់គ្រួសារ មិនមែនជាគូស្វាមីភរិយា ឬកូនៗរបស់អ្នកឡើយ។
១    បើកកិច្ចពិភាក្សាដោយស្ងប់ស្ងាត់ និងស្មោះត្រង់: ត្រូវអង្គុយពិភាក្សាគ្នាដោយគ្មានការបន្ទោសបង្អាប់។ ទទួលស្គាល់កំហុសដែលធ្លាប់បានធ្វើរួមគ្នា ឬរៀងៗខ្លួន (ឧ. ការចំណាយហួសហេតុ) ហើយសន្យាថានឹងកែប្រែ។
២    បង្កើតក្រុមការងារហិរញ្ញវត្ថុ: ត្រូវឲ្យសមាជិកគ្រួសារទាំងអស់ (រួមទាំងកូនៗដែលមានវ័យគ្រប់គ្រាន់) ចូលរួមសហការគ្នា។ បង្រៀនពួកគេឲ្យយល់ពីស្ថានការណ៍ និងចូលរួមចំណែកក្នុងផែនការសន្សំ ដូចជាការកាត់បន្ថយចំណាយលើតម្រូវការមិនចាំបាច់ជាដើម។ ការសាមគ្គីគ្នាគឺជាកម្លាំងដ៏ធំបំផុតក្នុងការយកឈ្នះបំណុល។

ការប្រឈមទី២៖ មានអារម្មណ៍ថាបំណុលច្រើនពេក សងមិនរួច
អារម្មណ៍នៃភាពអស់សង្ឃឹម និងគិតថាបំណុលច្រើនលើសលប់រហូតសងមិនរួច អាចធ្វើឲ្យមនុស្សបោះបង់ចោលការតស៊ូ។
💡 ដំណោះស្រាយ៖ ការអនុវត្តន៍ផែនការគ្រប់គ្រងថវិកាដ៏ហ្មត់ចត់ (Mastering Your Budget)
ការគ្រប់គ្រងថវិកា គឺជាឧបករណ៍ដ៏មានប្រសិទ្ធភាពបំផុតក្នុងការវាយបំបែកបំណុលជាជំហានៗ។
១. កំណត់គម្រោងថវិកាពិតប្រាកដ: ចាប់ផ្តើមកត់ត្រារាល់ចំណូល-ចំណាយទាំងអស់របស់គ្រួសារក្នុងរយៈពេលយ៉ាងតិចមួយខែ ដើម្បីដឹងពីស្ថានភាពហិរញ្ញវត្ថុពិតប្រាកដ។ ត្រូវដឹងថាលុយរបស់អ្នកទៅណាខ្លះ។
២. កាត់បន្ថយចំណាយដែលមិនចាំបាច់:
o    ចំណាយសំខាន់ៗ: ទិញតែរបស់ដែលចាំបាច់ពិតប្រាកដ។ ឈប់ចំណាយលើភាពហ៊ឺហារ ឬរបស់ដែលមិនបង្កើតប្រាក់ចំណេញ។
o    របៀបរស់នៅ: ខ្ចប់អាហារពីផ្ទះទៅធ្វើការ ឬទៅសាលារៀន ជំនួសឲ្យការទិញខាងក្រៅ។ កាត់បន្ថយការប្រើប្រាស់យានជំនិះថ្លៃៗ និងប្រភពចំណាយផ្សេងទៀត (ឧ. ការជាវសេវាកម្មកម្សាន្តដែលមិនសូវប្រើ)។
៣. បង្កើនចំណូលបន្ថែម: ស្វែងរកឱកាសការងារ ឬមុខរបរបន្ទាប់បន្សំ។ ពិចារណាលក់របស់របរដែលមិនត្រូវការ ឬមិនប្រើប្រាស់ដើម្បីបង្កើនសាច់ប្រាក់សុទ្ធសម្រាប់ដោះស្រាយបំណុល។
៤. ចរចាជាមួយម្ចាស់បំណុល (Proactive Negotiation): ប្រសិនបើលោកអ្នកពិតជាមានការលំបាកក្នុងការសង សូមកុំគេចវេះ។ ត្រូវព្យាយាមទាក់ទង និងនិយាយជាមួយស្ថាប័ន ឬម្ចាស់បំណុលដោយត្រង់ៗ ដើម្បីសុំ៖
o    ពន្យារពេលបង់សង (Grace Period)
o    រៀបចំកម្ចីឡើងវិញ ឬបន្ធូរបន្ថយ (Debt Restructuring)
o    ស្នើសុំការកាត់បន្ថយអត្រាការប្រាក់។ ការចរចាប្រកបដោយការទទួលខុសត្រូវ អាចជួយកាត់បន្ថយសម្ពាធបានច្រើន។

ការប្រឈមទី៣៖ បំណុលធ្វើឲ្យសុញគំនិត និងភ្លេចរឿងសំខាន់ផ្សេងទៀត
សម្ពាធបំណុលអាចធ្វើឲ្យអ្នកបាត់បង់ការផ្តោតអារម្មណ៍ ថប់បារម្ភ និងមើលរំលងតម្លៃពិតប្រាកដនៃជីវិតគ្រួសារ និងសុខភាព។
💡 ដំណោះស្រាយ៖ ផ្ដោតលើតម្លៃពិតនៃជីវិត (Money Isn't Everything)
ត្រូវចងចាំជានិច្ចថាលុយគឺជាឧបករណ៍សម្រាប់សម្រួលជីវិត មិនមែនជាអ្វីៗទាំងអស់ក្នុងជីវិតទេ។
១,    ចេះស្កប់ស្កល់ និងដឹងគុណ: រៀនរីករាយនឹងអ្វីដែលអ្នកមាននៅពេលបច្ចុប្បន្ន។ ទទួលស្គាល់ថាទោះបីជាមានបំណុលក៏ដោយ ក៏អ្នកនៅតែមានគ្រួសារ មិត្តភក្តិ និងសុខភាព ដែលជាទ្រព្យសម្បត្តិដ៏មានតម្លៃមិនអាចកាត់ថ្លៃបាន។
២    ផ្ដោតលើ "អ្វីដែលសំខាន់ជាង": បញ្ចូលការចំណាយលើពេលវេលាប្រកបដោយគុណភាពទៅក្នុងផែនការថវិកា។
o    ចំណាយពេលលេងកម្សាន្តជាមួយកូនៗ និងគូស្វាមីភរិយា (ដែលមិនចំណាយលុយច្រើន ដូចជាការដើរលេងក្នុងសួនសាធារណៈ ឬចម្អិនអាហាររួមគ្នា)។
o    ថែរក្សាសុខភាពផ្លូវចិត្ត និងរាងកាយ។ ការធ្វើលំហាត់ប្រាណ ការគេងគ្រប់គ្រាន់ និងការអនុវត្តន៍សមាធិ អាចជួយកាត់បន្ថយភាពតានតឹងបានយ៉ាងច្រើន។
៣   ពង្រឹងសតិរបស់អ្នក: បំណុលគ្រាន់តែជាបញ្ហាបណ្តោះអាសន្នប៉ុណ្ណោះ។ ដរាបណាអ្នកនៅតែមានសុខភាពល្អ និងការគាំទ្រពីគ្រួសារ អ្នកនឹងមានលទ្ធភាពតស៊ូ និងដោះស្រាយវាបានជាមិនខាន។

សេចក្តីសន្និដ្ឋាន
ការដោះស្រាយបញ្ហាបំណុលទាមទារនូវភាពក្លាហាន វិន័យ និងការសហការគ្នារបស់គ្រួសារទាំងមូល។ តាមរយៈការផ្លាស់ប្តូរផ្នត់គំនិត (សហការគ្នាប្រឆាំងសត្រូវរួម) ការគ្រប់គ្រងថវិកាយ៉ាងហ្មត់ចត់ (កំណត់ថវិកា កាត់បន្ថយចំណាយ បង្កើនចំណូល និងចរចា) និងការរក្សាតុល្យភាពផ្លូវចិត្ត (ផ្ដោតលើគ្រួសារ និងសុខភាព) គ្រួសារលោកអ្នកនឹងអាចឈានទៅរកសេរីភាពហិរញ្ញវត្ថុ និងរីករាយនឹងជីវិតដ៏មានសុភមង្គលពិតប្រាកដ។