សារប្រធាននាយកប្រតិបត្តិ

គោរពជូនចំពោះភាគីពាក់ព័ន្ធទាំងអស់ជាទីរាប់អាន!
ឆ្នាំ ២០២៥ គឺជាទំព័រថ្មីដ៏សំខាន់មួយក្នុងដំណើររបស់ ហ្វឺស ហ្វាយនែន។ ក្នុងឆ្នាំនេះ យើងសម្រេចបាននូវសមិទ្ធផលដ៏ធំធេងមួយ គឺការជំរុញផលប័ត្រឥណទានឱ្យហក់ហួស ១០០ លានដុល្លារអាមេរិក ព្រមទាំងបានបញ្ជាក់ជាថ្មីនូវការប្តេជ្ញាចិត្តរបស់យើងចំពោះកំណើនប្រកបដោយការទទួលខុសត្រូវ បរិយាបន្នហិរញ្ញវត្ថុ និងផលប៉ះពាល់សង្គមដែលអាចវាស់វែងបាន។ នៅពីក្រោយសមិទ្ធផលនេះ គឺមានគ្រួសារកម្ពុជាចំនួន ១១,៨៤៧ គ្រួសារ ដែលបច្ចុប្បន្នកំពុងរីករាយជាមួយស្ថិរភាព សេចក្តីថ្លៃថ្នូរ និងឱកាសកាន់តែប្រសើរតាមរយៈការមានផ្ទះជាកម្មសិទ្ធផ្ទាល់ខ្លួន។

កំណើនប្រកបដោយភាពធន់ក្នុងទីផ្សារដែលមានការកែសម្រួល
ទោះបីជាមានការកែសម្រួលជាបន្តបន្ទាប់នៅក្នុងទីផ្សារអចលនទ្រព្យក៏ដោយ សេដ្ឋកិច្ចកម្ពុជាក្នុងឆ្នាំ ២០២៥ នៅតែរក្សាបាននូវស្ថិរភាព ដោយទទួលបានការគាំទ្រពីការងើបឡើងវិញនៃវិស័យ សំខាន់ៗ។ ក្នុងបរិបទនេះ ហ្វឺស ហ្វាយនែន បានបង្ហាញពីកំណើនប្រកបដោយវិន័យ និងប្រតិបត្តិការដែលមានភាពធន់។
ផលប័ត្រឥណទានសរុបរបស់យើងខ្ញុំបានកើនឡើងដល់ ១០០,៤ លានដុល្លារអាមេរិក ដែលឆ្លុះបញ្ចាំងពីការកើនឡើង ១១,៩% ធៀបនឹងឆ្នាំមុន ខណៈដែលទ្រព្យសកម្មសរុបបានកើនឡើងដល់ ១០៧,៤ លានដុល្លារអាមេរិក។ យើងខ្ញុំសម្រេចបាននូវប្រាក់ចំណេញក្រោយបង់ពន្ធចំនួន ១,០៦ លានដុល្លារអាមេរិក ដោយផ្តល់នូវអនុបាតចំណេញលើទ្រព្យសកម្ម (ROA) ១,០៦% និងអនុបាតចំណេញលើមូលធន (ROE) ៦,០៦%។ លទ្ធផលទាំងនេះសបញ្ជាក់ថា និរន្តរភាពហិរញ្ញវត្ថុ និងសុចរិតភាពសង្គម គឺជាកត្តាដែលជួយជំរុញគ្នាទៅវិញទៅមក។
អ្វីដែលសំខាន់នោះគឺ ៩១% នៃអតិថិជនរបស់យើងខ្ញុំរស់នៅក្នុងតំបន់ជនបទ ហើយ ៨១% គឺជាស្វ័យនិយោជន៍ ឬអ្នកមានចំណូលតែមិនមានឯកសារបញ្ជាក់ច្បាស់លាស់ ហើយពួកគាត់ជារឿយៗ មិនសូវទទួលបានសេវាពេញលេញពីគ្រឹះស្ថានហិរញ្ញវត្ថុផ្លូវការ។ ប្រហែល ៧៤% គឺជាអ្នកដែលមានផ្ទះជាលើកដំបូង។ នេះគឺជាការវាស់វែងពិតប្រាកដនៃជោគជ័យរបស់យើងខ្ញុំ។

ការពង្រីកវិសាលភាព និងការពង្រឹងសហគមន៍
ក្នុងឆ្នាំ ២០២៥ យើងខ្ញុំបានពង្រីកខ្លួនទៅកាន់ខេត្តចំនួន ៦ បន្ថែមទៀត រួមមាន៖ តាកែវ ព្រៃវែង ស្វាយរៀង កំពង់ធំ ពោធិ៍សាត់ និងកំពង់ឆ្នាំង ដែលធ្វើឱ្យបណ្តាញការិយាល័យទូទាំងប្រទេសកើនដល់ ២០ សាខា។ ការពង្រីកនេះអនុញ្ញាតឱ្យយើងខ្ញុំផ្តល់ហិរញ្ញប្បទានលំនៅដ្ឋានតម្លៃសមរម្យដល់គ្រួសារដែលត្រូវការបំផុត។
ក្រៅពីការផ្តល់ឥណទានលំនៅឋាន យើងខ្ញុំបន្តគាំទ្រដល់លក្ខខណ្ឌរស់នៅប្រកបដោយសុខភាពល្អ។ អតិថិជនប្រហែល ៥១% បានប្រើប្រាស់ឥណទានរបស់ពួកគេដើម្បីកែលម្អប្រព័ន្ធទឹកស្អាត បង្គន់អនាម័យ (WASH) ដែលរួមចំណែកដោយផ្ទាល់ដល់ការលើកកម្ពស់សុខភាពគ្រួសារ និងភាពធន់នឹងការប្រែប្រួលអាកាសធាតុ។
វិធីសាស្ត្រដែលផ្ដោតលើអតិថិជនជាចម្បងរបស់យើងខ្ញុំនៅតែរឹងមាំ ដែលអាចឆ្លុះបញ្ចាំងតាមរយៈអត្រារក្សាអតិថិជនបានរហូតដល់ ៩៨% និងពិន្ទុសុច្ឆទ្ទៈអតិថិជន (NPS) កើនឡើងដល់ ៦៨.៦% ដែលនេះបង្ហាញពីទំនុកចិត្ត និងការពេញចិត្តប្រកបដោយនិរន្តរភាពក្នុងចំណោមសហគមន៍ដែលយើងខ្ញុំបម្រើ។

អភិបាលកិច្ច សុចរិតភាព និងហិរញ្ញវត្ថុប្រកបដោយការទទួលខុសត្រូវ
សុចរិតភាពនៅតែជាស្នូលនៃយុទ្ធសាស្ត្រកំណើនរបស់យើងខ្ញុំ។ ក្នុងឆ្នាំ ២០២៥ ហ្វឺស ហ្វាយនែន បានទទួលវិញ្ញាបនបត្រកម្រិតមាសលើកិច្ចការពារអតិថិជន ជាលើកទីពីរជាប់គ្នា ដោយសម្រេចបានពិន្ទុយ៉ាងខ្ពស់រហូតដល់ ៩៩.១%។ ការទទួលស្គាល់នេះសង្កត់ធ្ងន់លើការប្តេជ្ញាចិត្តរបស់យើងខ្ញុំចំពោះការកំណត់តម្លៃប្រកបដោយយុត្តិធម៌ ការការពារការជាប់បំណុលលើសលប់ ឯកជនភាពទិន្នន័យ និងការប្រព្រឹត្តចំពោះអតិថិជនប្រកបទៅដោយក្រមសីលធម៌។
យើងខ្ញុំក៏បានរក្សានូវស្លាកសញ្ញាពណ៌ទឹកក្រូច (Orange Seal) ដែលឆ្លុះបញ្ចាំងពីវឌ្ឍនភាពបន្តបន្ទាប់របស់យើងខ្ញុំលើសមភាពយេនឌ័រ និងនិរន្តរភាពបរិស្ថាន។ ការទទួលស្គាល់ទាំងនេះបញ្ជាក់ថា អភិបាលកិច្ចរឹងមាំ និងហិរញ្ញវត្ថុប្រកបដោយការទទួលខុសត្រូវ គឺជាមូលដ្ឋានគ្រឹះនៃនិរន្តរភាពរយៈពេលវែងរបស់យើងខ្ញុំ។

នវានុវត្តន៍ឌីជីថល និងចំណេះដឹងហិរញ្ញវត្ថុ
យើងខ្ញុំបានបន្តពង្រឹងសមត្ថភាពឌីជីថល ដើម្បីបង្កើនប្រសិទ្ធភាព សុវត្ថិភាពប្រព័ន្ធ និងបទពិសោធន៍អតិថិជន ដោយសម្រេចបាននូវស្ថិរភាពប្រព័ន្ធប្រតិបត្តិការ ៩៩.៩% និងបានភ្ជាប់ជាមួយថ្នាលរបស់ដៃគូតាមរយៈប្រព័ន្ធ KHQR ដើម្បីផ្តល់នូវជម្រើសនៃការទូទាត់សងប្រាក់ដែលលឿន មានសុវត្ថិភាព និងកាន់តែងាយស្រួលសម្រាប់អតិថិជន។
ក្នុងឆ្នាំ ២០២៥ យើងក៏បានពង្រឹងគំនិតផ្តួចផ្តើមពាក់ព័ន្ធចំណេះដឹងហិរញ្ញវត្ថុ ដោយប្រើប្រាស់មាតិកាជាវីដេអូដែលបង្កើតដោយបញ្ញាសិប្បនិម្មិត ផ្សព្វផ្សាយនៅលើបណ្តាញឌីជីថលរបស់យើងខ្ញុំ។ តាមរយៈវីដេអូអប់រំដែលទាក់ទាញ និងងាយយល់ យើងបានជំរុញការយល់ដឹងអំពីការខ្ចីប្រាក់ប្រកបដោយការទទួលខុសត្រូវ ការគ្រប់គ្រងហិរញ្ញវត្ថុគ្រួសារបានល្អ និងវិន័យហិរញ្ញវត្ថុរយៈពេលវែង។ ការមានផ្ទះជាកម្មសិទ្ធិផ្ទាល់ខ្លួនប្រកបដោយនិរន្តរភាព ចាប់ផ្តើមពីការសម្រេចចិត្តដែលមានព័ត៌មានច្បាស់លាស់ ហើយយើងនៅតែប្តេជ្ញាចិត្តក្នុងការផ្តល់ជូនគ្រួសារទាំងនោះ នូវចំណេះដឹង និងឧបករណ៍អនុវត្តន៍ជាក់ស្តែងដែលចាំបាច់ដើម្បីទទួលបានជោគជ័យផ្នែកហិរញ្ញវត្ថុ។

ទស្សនវិស័យទៅថ្ងៃអនាគត
មូលដ្ឋានគ្រឹះរបស់យើងខ្ញុំ គឺមានលក្ខខណៈរឹងមាំ បើទោះបីជាលក្ខខណ្ឌទីផ្សារនៅតែមានការប្រែប្រួល ហើយថ្លៃដើមហិរញ្ញប្បទានតម្រូវឱ្យមានការគ្រប់គ្រងប្រកបដោយការប្រុងប្រយ័ត្នក៏ដោយ។ យើងខ្ញុំនឹងបន្តការពង្រីកខ្លួនប្រកបដោយវិន័យ ពង្រឹងការគ្រប់គ្រងហានិភ័យ និងការបញ្ជ្រាបបរិស្ថាន សង្គម និងអភិបាលកិច្ច (ESG) ឱ្យកាន់តែស៊ីជម្រៅ ព្រមទាំងជំរុញនវានុវត្តន៍ឌីជីថល ដើម្បីបម្រើអតិថិជនឱ្យកាន់តែប្រសើរឡើង។
សមិទ្ធផលជាផលប័ត្រឥណទាន ១០០ លានដុល្លារ មិនមែនជាទីបញ្ចាប់នោះទេ ប៉ុន្តែវាគឺជាមូលដ្ឋានគ្រឹះសម្រាប់ផលប៉ះពាល់ដែលនឹងរីកចម្រើនកាន់តែធំធេងជាងនេះ។ នៅពេលយើងខ្ញុំឆ្ពោះទៅកាន់ឆ្នាំ ២០២៦ បេសកកម្មរបស់យើងខ្ញុំនៅតែច្បាស់លាស់៖ គឺការកសាងស្ថិរភាពសេដ្ឋកិច្ចនៃគ្រួសារកម្ពុជាដែលមានចំណូលទាប តាមរយៈការពង្រីកលទ្ធភាពទទួលបានកម្មសិទ្ធិលើលំនៅដ្ឋានដែលមានសុវត្ថិភាព និងតម្លៃសមរម្យ។
ក្នុងនាមគណៈគ្រប់គ្រង ខ្ញុំសូមថ្លែងអំណរគុណយ៉ាងជ្រាលជ្រៅចំពោះក្រុមប្រឹក្សាភិបាលសម្រាប់ការណែនាំជាយុទ្ធសាស្ត្រ ចំពោះបុគ្គលិកទាំងអស់សម្រាប់ការពុះពារ និងប្រកបការងារដោវិជ្ជាជីវៈ ចំពោះដៃគូផ្តល់ហិរញ្ញប្បទានសម្រាប់ទំនុកចិត្តជាបន្តបន្ទាប់ និងចំពោះនិយ័តករទាំងអស់ សម្រាប់ការគ្រប់គ្រង និងផ្តល់ការណែនាំ។ លើសពីនេះ ខ្ញុំសូមអរគុណដល់អតិថិជនសម្រាប់ទំនុកចិត្តដែលបានផ្តល់ជូន ហ្វឺស ហ្វាយណាន់ ជារៀងរាល់ថ្ងៃ។
យើងរួមគ្នា កសាងលើសពីផ្ទះសម្បែង គឺយើងកំពុងកសាងគ្រួសារឱ្យកាន់តែរឹងមាំ សហគមន៍ដែលមានភាពធន់ និងអនាគតដែលពោរពេញដោយបរិយាបន្នសម្រាប់កម្ពុជា។
សូមទទួលការគោរពរាប់អានអំពីខ្ញុំបាទ